ჭიათურაში ერთ-ერთმა მაღაროელმა პროტესტის ნიშნად თვალები ამოიკერა.
"ეს იყო ჩემი პირადი გადაწყვეტილება. მოშიმშილეებს ვისაც ვუთხარი, ლამის ყველა წინააღმდეგი იყო. მინდა, ამით ყველას დავანახო, რომ ერთმანეთის გვერდით ძლიერები ვართ. მე არ მინდა დავინახო "ჯორჯიან მანგანეზი“, არ მინდა დავინახო ეს ხალხი, სანამ ჩვენი საქმე არ მოგვარდება. როცა მოგვარდება, ერთად დავინახავთ ყველა“, – განაცხადა მან ვიდეოში, რომელიც "მაღაროელმა“ გაავრცელა.
უკვე თითქმის ორი კვირაა მაღაროელები საპროტესტო აქციას მართავენ. რამდენიმე დღის წინ ერთმა მაღაროელმა პროტესტის ნიშნად პირი ამოიკერა.
შიმშილობა აქვს გამოცხადებული 10-ამდე მაღაროელს.
გაფიცული მაღაროელები ხელფასების გაზრდას, სამუშაო პირობების გაუმჯობესებას და შრომის უსაფრთხოების დაცვას მოითხოვენ.
მათი თქმით, შიმშილობის დაწყების გადაწყვეტილება მას შემდეგ მიიღეს, რაც კომპანია დათმობაზე არ წავიდა. როგორც ისინი აცხადებენ, სახელმწიფო, რომელიც ამ ეტაპზე მხოლოდ მედიატორის ფუნქციით შემოიფარგლება, უფრო აქტიურად უნდა ჩაერთოს პრობლემების მოგვარებაში.
მაღაროელთა თქმით, კომპანია "ჯორჯიან მანგანეზი" არ თანხმდება მთავარ მოთხოვნას - ხელფასის 40%-ით მომატებას და სამუშაო გრაფიკის უცვლელად დატოვებას. კომპანიის ადმინისტრაცია მათ სახელფასო ანაზღაურების მხოლოდ 5%-იან მატებას სთავაზობს, რაც მათთვის მიუღებელია. ასევე მიუღებელია 12-საათიანი სამუშაო გრაფიკის ნაცვლად, დღეში 8-საათიან სამუშაო გრაფიკზე გადასვლა, რადგან ამით დასვენების დღები 14-დან 8-მდე უმცირდებათ.
კომპანია თანამშრომლებს სთავაზობს შეწყვიტონ პროტესტი, განაახლონ მუშაობა და მუშაობის შედეგად რა ეკონომიკური ეფექტიანობაც იქნება მიღწეული, იმის მიხედვით განისაზღვროს თანამშრომელთა ბონუსები და ბენეფიტები.
კომპანიასა და დასაქმებულებს შორის მედიაციის პროცესში ჯანდაცვის სამინისტრო 12 ივნისს ჩაერთო, სადაც აცხადებენ, რომ პროცესში, ორივე მხარის ინტერესები სრულად იქნება გათვალისწინებული.
