კომპანია Wizz Air-ის თვითმფრინავი, რომელიც მილანიდან ქუთაისში ასრულებდა რეისს, თბილისის აეროპორტში დაჯდა.
როგორც აეროპორტების გაერთიანებაში აცხადებენ, ამ დროისთვის წვიმამ გადაიღო და რეისი ბარსელონასკენ, რომელიც ამავე თვითმფრინავს უნდა განეხორციელებინა, 17:30 საათზე შესრულდება.
„ბაზირებული რეისია, მილანიდან ჩამოფრენის შემდეგ, ქუთაისიდან ბარსელონას მგზავრები უნდა წაეყვანა. თბილისში შეავსებს საწვავს, ქუთაისში გადაფრინდება მგზავრებიანად და 17:30 საათზე გაფრინდება ბარსელონას მიმართულებით“, - აცხადებენ აეროპორტების გაერთიანებაში.
ცნობისთვის, დასავლეთ საქართველოში უამინდობის გამო, დღესვე, 40 წუთის განმავლობაში შავი ზღვის თავზე დაფრინავდა სტამბოლი-ბათუმის რეისი, საბოლოოდ კი, თვითმფრინავი ბათუმის აეროპორტში მშვიდობით დაჯდა.
