სამ აგვისტოს შოვში საშინელი სტიქია დაიწყო, რამაც რამდენიმე ადამიანის სიცოცხლე იმსხვერპლა. არიან დაშავებულები და დაკარგულები.
შოვში, სტიქიის ზონაში მაშველებმა კიდევ ოთხი გარდაცვლილის ცხედარი იპოვეს. ამის შესახებ ambebi.ge - ს შსს-ში განუცხადეს.
შეგახსენებთ, გუშინ მაშველებმა იპოვეს ორი ადამიანის ცხედარი. ამ დროისთვის სულ 6 გარდაცვლილი ადამიანია ნაპოვნი.
სტიქიის ზონაში აქტიურად მიმდინარეობს სამაშველო ღონისძიებები.
საგანგებო სიტუაციების მართვის სამსახურის უფროსის, თემურ მღებრიშვილის განცხადებით, რაჭაში, სტიქიის ზონაში მეწყრის ჩამოწოლის შედეგად, მიწის მასა ძალიან დიდ ტერიტორიაზეა გაშლილი, რის გამოც მაქსიმალურად ფრთხილად მუშაობენ.
"დილის 06:30 საათიდან დავიწყეთ ვერტმფრენებით იმ ადამიანების ეპიცენტრიდან გამოყვანა, რომელიც გუშინ უსაფრთხო ადგილებში მობილიზებული გვყავდა. დღეს 140 ადამიანი გამოვიყვანეთ. ყველა ეპიცენტრში შესულები ვართ. სადაც კოტეჯები არსებობდა, იქ ფაქტობრივად, არაფერი არის. არის კოტეჯების ფრაგმენტები. ჯერჯერობით, იმ ადგილებამდე ვერ მივედით იქიდან გამომდინარე, რომ მიწის მასის ძალიან სქელი ფენაა და მეხანძრე-მაშველები ეფლობიან. სწორედ ამიტომ ხდება ახლა ტექნიკის შეყვანა, რომ გზა გაიჭრას და იქამდე მივიდეთ“,-განაცხადა თემურ მღებრიშვილმა.