სოციალურ ქსელში გივი ბერინაძის გავრცელებული ინფორმაციის თანახმად, 3 აგვისტოს, შოვში მომხდარი სტიქიის დროს დაკარგული, 4 წლის გიორგი ხორბალაძეს ცხედარი იდენტიფიცირებულია.
"ამდენი წამების შემდეგ დღეს სახლში ბრუნდები ჩემო გიო. ცოტა დაისვენე, დაღლილი იქნები. მერე დედიკოსთან და ბებოსთან გაიქეცი, ჩაეხუტე და დაელოდე, მეც მალე მოვალ“, - წერს მამაკაცი.
ინფორმაცია დაადასტურა შოვში გარდაცვილი სამირა ისაევას ძმამ, ისკანდერ ისაევმა. მისი თქმით, გარდაცვლილი ბავშვის ცხედარს რუსთავში დღეს მიასვენებენ.
18 წლის სამირა ისაევა მეზობლებთან მანანა ჯაჭვაძესთან, მარინა ხორბალაძესთან და შვილიშვილ 4 წლის გიორგი ხორბალაძესთან ერთად იყო შოვში დასასვენებლად წასული.
სამირა ისაევასა და მარინა ხორბალაძის ცხედარები 6 აგვისტოს იპოვეს. 13 აგვისტოს იპოვეს მანანა ჯაჭვაძის ცხედარი, 30 აგვისტოს კი ცნობილი გახდა, რომ 4 წლის გიორგი ხორბალაძის ცხედარი იდენტიფიცირებულია.
ცნობისთვის, შოვში მეწყერი 3 აგვისტოს ჩამოწვა. სტიქიამ ათობით ადამიანი იმსხვერპლა. ბოლო ინფორმაციით, ნაპოვნია 31 ადამიანის ცხედარი, ორ ადამიანს ამ დრომდე ეძებენ.
წყარო: ambebi.ge
