გუშინ საქართველომ ევროპის ჩემპიონატის საკვალიფიკაციო ეტაპზე ესპანეთს უმასპინძლა და 1:7 დამარცხდა.
პირველი ტაიმი საქართველოს ნაკრებმა ანგარიშით 0:4 დათმო. მამარდაშვილის კარში პირველი გოლი 22 - ე წუთზე ალვარო მორატამ გაიტანა, 27-ე წუთზე ავტოგოლი კვირკველიამ მიითვალა, 38 წუთზე ქართველების კარი დანი ოლმომ დალაშქრა, მე-40 წუთზე კი ისევ - მორატამ.
მეორე ტაიმის დასაწყისში ჩვენი გუნდის მწვრთნელმა ვილი სანიოლმა რამდენიმე შეცვლა განახორციელა, მათგან ყველაზე წარმატებული აღმოჩნდა აბურჯანიას ნაცვლად გიორგი ჩაკვეტაძის შემოსვლა, რომელიც შეიძლება ითქვას, რომ საქართველოს ნაკრებში ყველაზე აქტიური იყო, სწორედ მან მოახერხა 49-ე წუთზე ესპანელთა კარის აღება. ის კიდევ ცდილობდა თამაშის გამწვავებას, თუმცა თანაგუნდელებმა მხარი ვერ აუბეს და საბოლოოდ გამანადგურებელი ანგარიშით დავმარცხდით.
მატჩის შემდეგ კომენტარი გააკეთა გუნდის კაპიტანმა:
"ძალიან ვწუხვარ გულშემატკივრის წინაშე, რომ ასეთი დიდი შედეგით წავაგეთ. ჩემთვის ერთ-ერთი ყველაზე სუსტი პერფორმანსი იყო, რაც მითამაშია ეროვნულ ნაკრებში. რა თქმა უნდა, ესპანეთის ნაკრებთან შეიძლება წააგო, მაგრამ ასეთი დიდი სხვაობა, არ მგონია, რომ უნდა ყოფილიყო. ხასიათი ვერ გამოვავლინეთ და შემდეგ თამაშში მინდა ვნახო ის ფეხბურთელები, ვინც ითამაშებენ ისე, რომ უფრო მეტი ხასიათი გამოავლინონ. არცერთი არ ვიმსახურებდით ჩვენი ნაკრების მაისურით თამაშს. რა აზრი აქვს ბოდიშს? გული მწყდება, რომ ასეთი ცუდი თამაში ვაჩვენეთ."- ამბობს გურამ კაშია.
