ნუცა შანშიაშვილი: ორ ადამიანს შორის, გარკვეული პერიოდი, არსებობს ეროტიკის ზღვა მიზიდულობა, ურთიერთ შეხება, სექსი, მატერიალური სიყვარულის აღმაფრენა, თითქოს და ის მესამე ძალა საიდანღაც ზეგადმოდის ამ ორ ადამიანზე და აერთიანებთ მათ. თითქოს ამ უხილავ მესამე ენერგიას უჭირავს ეს ორი შეყვარებული ადამიანი გარკვეული პერიოდი უდიდესი მიზიდულობის მეშვეობით.
მერე ეს ძალა სადღაც ქრება, უჩინარდება და ადრე ერთმანეთში უზომოდ შეყვარებულებს, რჩებათ უდიდესი სიცარიელე!
იწყება ურთულესი პერიოდი, ორივე ცდილობს მოიგონოს, მოეპოტინოს იმ წარსულ აღმაფრენას და ის კი დაუნდობლად გამქრალია...
სწორედ ამ ყველაფრის მერე იწყება პრეტენზიები, ეგოს ზეიმი და ერთმანეთის დამცირება და ზეწოლა...
რა უნდა გააკეთოს ადამიანმა მსგავსი მდგომარეობის დროს? ურთულესი კითხვაა, რადგან მილიონი ოჯახი იტანჯება მსგავსი ურთიერთობების შენარჩუნებით!
თუ ქმნი ოჯახს არასოდეს არ დააყენო პირველ პლანზე ეროტიკა, რომელსაც მე, პირადად, ყველაზე ნამდვილ გრძნობად ვთვლი ორ შეყვარებულ ადამიანს შორის!
მოძებნე ერთგული მეგობარი თუ მაინცდამაინც გინდა შექმნა ოჯახი, რომელიც არასოდეს არ მოგბეზრდება იმიტომ, რომ პირველ რიგში ის შენი მეგობარია;
ნუ აჰყვები ემოციებს მაშინ, როდესაც ისინი იწყებენ კვდომას შენს გულში, რაც იყო - იყო, გაუშვი... მოვა ახალი;
იოლად დაემშვიდობე იმ ადამიანს, რომელთანაც გქონდა დიდი გრძნობა, სიყვარული, რადგან, როდესაც ქრება მსგავსი ემოცია, მის რეანიმირებას აზრი აღარ აქვს, მან თავისი მოიტანა, რაც უნდა მოეტანა შენთვის და წავიდა; ამიტომ გაუშვი და ნუ მისდევ წარსულს;
ყველაფერი, რაც ხდება არის უდიდესი გაკვეთილი ჩვენი აღზრდისათვის. ერთადერთი, რასაც უნდა გაუფრთხილდეთ და არ დაზოგოთ თავი მაშინ, როდესაც გეძლევათ ემოცია, მიზიდულობა სურვილი, სიგიჟე იყოთ სხვა ადამიანთან ერთად, იცოდეთ, ეს ყველაფერი არის ლიმიტირებული დროში; ამიტომ მაქსიმალურად იგრძენით თავი ბედნიერად და ლაღად, გადაეშვით სრული ემოციით და თავდავიწყებით გრძნობაში, ნუ, თუ ეს შესაძლებელია მორალური ფარგლების არა დარღვევით და შეიგრძენით მთელი თქვენი არსებით სამყაროს სიდიადე და სიამოვნება, რადგან ეს ყველაფერი მალე ქრება და სანამ გაქვთ, იზეიმეთ ამ ურთიერთობით; ნუ დაკარგავთ ნურცერთ წამს საკუთარი ამბიციის გამო, იცოდეთ, ყველაფერი მთავრდება!
