წლის კელსი ჰეტჩერი სამი შვილის დედაა და ცენტრალურ ალაბამაში ცხოვრობს. უჩვეულო მის ცხოვრებაში არაფერი იქნებოდა, რომ არა თანდაყოლილი ანომალია, ქალი ორი საშვილოსნოთი დაიბადა. ამჯერად კელსი კიდევ ორ შვილს ელოდება და ორივე საშვილოსნოთი ორსულად არის.
ამ იშვიათმა მოვლენამ ადგილობრივი ექიმები შოკში ჩააგდო.
კელსისა და მის მეუღლეს, კალებ ჰეტჩერს დატვირთული ცხოვრება აქვთ. ორივე მუშაობს და ჰყავთ სამი შვილი - 7, 4 და 2 წლის.
ოჯახი კიდევ ერთ შვილზე აღარ ფიქრობდა, მაგრამ გაზაფხულზე ქალმა გაიგო, რომ ორსულად იყო. პირველ ექოსკოპიაზე წყვილი შოკში ჩავარდა, როდესაც გაიგეს, რომ კიდევ ორ შვილს ელოდნენ.
მაგრამ ექიმი გაოგნებული დარჩა არა ტყუპი ნაყოფით, არამედ ქალის ორივე მოქმედ საშვილოსნოში თითო ნაყოფის ნახვით.
შემთხვევა იმითაცაა განსაკუთრებული, რომ ორივე საშვილოსნოს საკუთარი საშვილოსნოს ყელი აქვს.
ქალის მეანი, შვეტა პატელი ამბობს, რომ ეს ისეთი იშვიათი მოვლენაა, რომ ვერასოდეს წარმოიდგენდა მსგავს ორსულს თუ ნახავდა.
კელსი ჰეტჩერი ამბობს, რომ მან დიდი ხანია იცის თავისი ფიზიკური უცნაურობის შესახებ, მაგრამ ორივე საშვილოსნოთი ორსულობა სამედიცინო სასწაულია. მართლაც, ეს 50 მილიონში შეიძლება ერთხელ მოხდეს.
ქალი გაოგნებულია საზოგადოების ამხელა ყურადღებით და ამბობს, რომ არ უყვარს ყურადღების ცენტრში ყოფნა.
ექიმის თქმით, დიდი შანსია, რომ თითოეულმა საშვილოსნომ სხვადასხვა დროს დაიწყოს შეკუმშვა და გოგონები დაიბადნონ საათების, დღეების ან კვირების ინტერვალით.
რამდენიმე კვირაში ჰეტჩერებს რვა წლამდე ასაკის ხუთი შვილი ეყოლება.
წყარო: Ambebi.ge
