გუშინ, საღამოს საკუთარ ავტომანქანაში ბიზნესმენი, ლევან კაჭარავა ჩაცხრილეს. მას 20 ტყვია აქვს მოხვედრილი.
ბიზნესმენი ლევან კაჭარავა 53 წლის იყო.
როგორც ცნობილია, ლევან კაჭარავა მის ბუღალტერთან ერთად სახლში, კაკლების დასახლებაში გადაადგილდებოდა. ერთ-ერთ მოსახვევში მას ბუჩქებში ჩასაფრებულმა ორმა ნიღბიანმა ავტომატიდან ცეცხლი გაუხსნა. ბიზნესმენი ადგილზე, ავტომანქანაში გარდაიცვალა, თანმხლები პირი კი გაიქცა, მისთვის არც არავის უსვრია.
მკვლელობა ბიზნესწილებს არ უკავშირდება და გამოძიების ერთ-ერთი ვერსიით, საქმე შურისძიებასთან გვაქვს, რომელიც თბილისში მომხდარ მკვლელობას უნდა უკავშირდებოდეს - ნიკო კვარაცხელიას მკვლელობას.
ლევან კაჭარავა რამდენიმე დღეა, რაც საფრანგეთიდან ჩამოვიდა, მამის ორმოცზე და ბოლო დროს დაცვის გარეშე არ გადაადგილდებოდა.
"როგორც ჩანს, გია კვარაცხელია მოქმედებაზე გადავიდა. ცნობილია, რომ ლევან კაჭარავა ძმებ კაკულიებთან ახლობლობდა. გიას სამიზნე ძმები არიან, მათ ციხეში ვერ მისწვდა, სამაგიეროდ, მისი შურისძიება კაკულიებთან დაახლოებული პირით დაიწყო. როგორც ამბობენ, სომხეთში გადასული მკვლელობის შემსრულებელი ბიჭები (აკო ჭელიძე და გიორგი კავილაძე) კაჭარავამ დააფინანსა. კვარაცხელია, სავარაუდოდ, არც გაჩერდებოდა და შესაძლოა, შურისძიების მსხვერპლთა რიცხვიც გაიზარდოს", - უყვება ერთ-ერთი მოქალაქე ambebi.ge-ის.